Zeynal Məmmədov: "Bu, Şefer və futbolçuların son şansıdır"

"Bakı" klubunun vitse-prezidenti Zeynal Məmmədov "Qəbələ" ilə oyun ərəfəsində baş məşqçi və legioner futbolçulara kəskin xəbərdarlıq edib. Klub rəsmisi bu qarşılaşmanın mühüm olduğunu söyləyib: "İlk altılığa düşmək yolunda sabahkı oyun mühüm əhəmiyyət daşıyır. Komandamızın vəziyyəti çətinləşib. İlk məqsədə çatmaq şansımız çox azdır. Nəzəri cəhətdən bu mümkün olsa da, bunu reallığa çevirmək lazımdır. "Qəbələ" ilə oyunda "Bakı"ya qələbə hava-su kimi vacibdir".
Vitse-prezident bildirib ki, komandanın prezidenti Hafiz Məmmədov baş məşqçi və futbolçularla ciddi söhbət edib: "Hafiz müəllim fikirlərini onlara çatdırıb. Geriyə yol yoxdur. Bu oyun baş məşqçi Şefer və futbolçuların son şansıdır". "Bakı" rəsmisi növbəti uğursuzluq olacağı təqdirdə, bəzi legionerlərlə yolların ayrılacağını sözlərinə əlavə edib: "Klub rəhbərliyi hərtərəfli şərait yaratsa da, bunun qarşılığı verilmir. Bizə oynaya bilməyən legionerlər lazım deyil"