“Bakı” Futbol Klubunun azarkeşlər arasında apardığı təbliğat kampaniyası davam edir. Bu gün komandamızın futbolçuları iki təhsil ocağında olaraq, azarkeşlərlə görüşüblər.
Səhər saatlarında Jaba, Fabio Luis Ramim, Mahmud Qurbanov, Elvin Əliyev, Gürşat Duymuş, Marko Şarliya, baş koordinator Akif Özakyol və klub işçilərindən bir neçəsi Bakı Özəl Türk Litseyini ziyarət ediblər.
Litseyin girişində futbolçularımızı coşquyla qarşılayan şagirdlər bu gün 29 yaşını qeyd edən Jabaya, həmçinin Mahmud Qurbanova gül dəstəsi hədiyyə ediblər. Komandamızın üzvlərini qarşılayan litseyin müdiri Hayreddin Ünvər əvvəlcə rəhbəri olduğu təhsil ocağı barədə geniş məlumat verib. Daha sonra H.Ünvər komandamızın üzvlərinə litseyin otaqlarını gəzdirib. Şəgirdlərin yüksək səviyyəli təhsil alması üçün yaradılan şərait qonaqları heyran edib.
Ardınca “Bakı”lılar konfrans zalına daxil olaraq, burada onları gözləyən yüzlərlə azarkeş qarşısına çıxıblar. Şagirdlərin suallarını həvəslə cavablandıran futbolçular daha sonra azarkeşlərinə avtoqraf, eləcə də komandamızın müxtəlif atributlarını, “Toplu Bakı” jurnalını paylayıblar.
Tədbirin sonunda isə təhsil ocağının rəhbərliyi Jabaya sürpriz hazırlayıb. Braziliyalı futbolçunun ad günü olduğundan, onun şərəfinə tort kəsilib.
Günorta saatlarında isə futbolçulardan Xalidu Sissoko, Cəmşid Məhərrəmov və Adnan Bərəkət, klubumuzun bir neçə işçisi, həmçinin fan-klubun rəhbəri Ruslan Hənifəyev 103 saylı orta məktəbdə azarkeşlərlə görüşüblər. Burada da sevimli futbolçularını sorğu-suala tutan şagirdlər “Bakı” klubunun atributlarına və “Toplu Bakı” jurnalına sahib çıxıblar.
Şagirlərlə görüşdən məmnun qalan futbolçular gələcəkdə də bu cür tədbirlərin keçirilməsinin vacibliyini qeyd ediblər.