“Bakı” FK fanatlar arasında təbliğat kampaniyası

“Bakı” Futbol Klubunun fanatlar arasında təbliğat kampaniyası davam edir. Komandanın 4 futbolçusu – Cəmşid Məhərrəmov, Xalidu Sissoko, Əhməd Ticani və Vyaçeslav Sofroni, həmçinin klub işçilərindən bir neçəsi bu gün Binəqədi rayonundakı 297 saylı orta məktəbdə yeniyetmə azarkeşlərlə görüşüb. Görüş zamanı təbliğat kampaniyasının əməli nəticəsi kimi “Bakı” fanklubunun üzvlərinin sayının artması və onların dəstəyi sahyəsində “Bakı”nın evdə “Xəzər Lənkəran”a, səfərdə isə “Qarabağ”a qalib gəlməsi göstərilib.

Məlim olub ki, görüş vaxtı sinifdəki şagirdlərin yarısından çoxu “Xəzər Lənkəran”a qarşı oyunda “Bakı”nı stadionda dəstəkləyib. “Qarabağ” qələbəsinin isə böyük əksəriyyəti televizorda seyr edib.

Görüş zamanı “Bakı” Futbol Klubu ilə bağlı viktorina da keçirilib. Komandanın tarixi ilə bağlı sualları dəqiq cavablandırmış fanatlar “Bakı”nın atributlarına və "Toplu Bakı" jurnalının yeni sayına sahib çıxıblar. Görüş zamanı gənc fanatlar bildiriblər ki, aprelin 23-də Unibank Premyer Liqasının XXIX turu çərçivəsində “Neftçi”yə qarşı oyunda da komandalarını durmadan qələbəyə səsləyəcəklər.

Tədbir zamanı bu cür görüşlərin tez-tez keçirilməsi, hətta qarşıdakı həftələrdə şagirdlərin “Bakı” Futbol Klubunun təlim-məşq bazasına ekskursisının təşkil olunması qərara alınıb. Tədbirin sonunda məktəblilər görüşə dəvət olunmuş futbolşularla şəkil çəkdirib, onlardan avtoqraf alıblar.