Türkiyə milli komandasının və "Qalatasaray"ın ulduz futbolçusu Sərvət Çətini ölkəmizdə hər kəs Azərbaycan türkü adlandırır. Səbəb isə onun Azərbaycan əsilli türklərin kompakt yaşadığı İqdırdan olması göstərilir. Hətta Sərvət özü də bir dəfə "azəri əsilli" olduğunu dilə gətirib.
Bu mövzuya yenidən qayıtmağımıza səbəb var. Belə ki, Türkiyənin bəzi internet saytlarının forumlarında Sərvətlə bağlı müzakirələrdə onun "kürd" olduğunu iddia edənlər var. Bu iddiada olanların fikrincə, futbolçunun doğulduğu Tuzluca qəsəbəsinin sakinlərinin əksəriyyəti kürdlərdir. Sərvət həqiqətən də, kürdlərin olduğu iddia edilən Tuzlucada doğulub. Amma bu qəsəbənin heç də böyük əksəriyyəti kürdlər deyil. Türkiyə mənbələrinə görə, 2007-ci ildə əhalinin siyahıya alınması zamanı Tuzluca sakinlərinin 25682 nəfər olduğu müəyyənləşib. Bunların isə büyük əksəriyyəti türklərdir, Türkiyə mətbuatının təbirincə desək - azəri türkləri.
Sərvətin Azərbaycan əsilli olduğunu sübut edən bir fakt: Türkiyə saytlarından birinin forumunda "Sərvət azəri deyil, kürddür" iddialarına cavab verən futbolçunun uzaq qohumlarından biri bu sözləri yazıb: Sərvət Tuzlucalıdandır və azəridir. Hardan bilirəm? Çünkü məndə tuzlucalıyam və uzaqdan Sərvətlə qohumluq əlaqələrimiz var. Biz azəriyik".
Sərvətin azəri əsilli olmasını sübut edən başqa bir fakt: Məşhur wikipedia.org saytında onunla bağlı səhifə bu cümlə ilə başlayır: "Servet Çetin (d. 17 Mart 1981 Tuzluca, Iğdır), defans (Stoper) mevkiinde görev yapan Azeri kökenli Türk milli futbolcu".
Türkiyə mediası bu gerçəyi çoxdan qəbul edib və əksər hallarda onu "azəri əsilli türk futbolçu" olaraq təqdim edir. Elə Dünya çempionatının seçmə mərhələsi çərçivəsində Bursada baş Türkiyə - Ermənistan oyunundan sonrada məhz bu məqamı qabartdılar. Əksər mətbuat orqanları türklərin ermənilər üzərində qələbəsini dünyaya "Türkiyə - Ermənistan matçında Azərbaycan bayraqları qadağan olunmuşdu. Amma "ay-ulduzlular"ın qalibiyyətini gətirən ikinci qolda yenə Azərbaycan kökənli bir futbolçumuzun imzası var idi" deyə çatdırdı.
Məlumat üçün qeyd edək ki, Sərvət peşakar futbolçu karyerasını 1998-ci ildə "Kartalspor"da (1998-2001, 53 oyun, 1 qol) başlayıb. Daha sonra ardıcıl olaraq "Göztepe" (2001-2002, 33 oyun, 1 qol), "Dənizlispor" (2002-2003, 33 oyun, 2 qol), "Fənərbaxça" (2003-2006, 63 oyun, 4 qol), "Sivasspor" (2006-2007, 33 oyun, 2 qol), "Qalatasaray" (2007, 112 oyun, 7 qol) klublarında çıxış edib. 1998-ci ildə iki dəfə Türkiyə U-17-sinə və iki dəfə U-17-nə dəvət alıb. 2002-2003-cü illərdə 7 dəfə U-21-ə çağırılıb və iki qola imza atıb. 2006-ci ildə bir dəfə Türkiyənin B millisində oynayıb. 2003-cü ildən əsas yığmaya çağırılır. İndiyə qədər 50 dəfə "ay-ulduzlu" formanı geyinib və 3 qola imza atıb. Malta (8 sentyabr 2007-ci il, 2:2), Ukrayna (12 avqust 2009-cu il, 3:0) və Ermənistanla (14 oktyabr 2009-cu il, 2:0) oyunlarda fərqlənib.